Monday, 14 September 2020

സ്മാരക ശിലകൾ: ഫിക്ഷൻ എഡിറ്റിങ്



സ്മാരകശിലകൾ വായിച്ചത് എന്റെ സെമിനാരി കാലഘട്ടത്തിലാണ്. അന്നെനിക്കൊപ്പമുണ്ടായിരുന്ന ശെമാശനാണ് (വൈദികാര്‍ത്ഥി) എനിക്ക് കുഞ്ഞബ്ദുള്ളയെ ആദ്യം പരിചയപ്പെടുത്തിയത്. വെറുതെ വായിച്ച് നോക്കാൻ പറഞ്ഞ് എനിക്ക് തന്ന ചുവന്ന പുറംചട്ടയുള്ള ആ പുസ്തകത്തെയും സെമിനാരിയിൽനിന്ന് പുറത്ത് പോന്നപ്പോൾ ഞാൻ ഒപ്പം കൂട്ടി. ഇത്തവണ ചേട്ടൻ അവധിക്ക് നാട്ടിൽ വന്ന് പോയപ്പോൾ സ്മാരകശില വായിക്കാനായി കൊണ്ടുപോയിരുന്നു. ഇന്നുരാവിലെ ചേട്ടൻ എനിക്കയച്ച ഒരുപറ്റം ശബ്ദ സന്ദേശങ്ങളാണ് ഈ കുറിപ്പിന് ആധാരം.

ചേട്ടൻ നിരത്തിയ വാദങ്ങൾ-

1. എടാ കുഞ്ഞബ്ദുള്ളേടെ സ്മാരകശില എന്ന ആ പുസ്തകമില്ലേ അത് നിറയെ തെറ്റുകളുണ്ട്. കുഞ്ഞാലിയുടെ സുന്നത്ത് കല്ല്യാണത്തിന് കൊണ്ടുന്ന മൂരിയെ കെട്ടിയിരിക്കുന്നത് പ്ലാവിൻ ചോട്ടിലാണെന്ന് ആദ്യം പറയുന്നു. രണ്ടാമത്, മൂരിയെ കൊല്ലാനായി അറവുകാരൻ മൂരിയെ കെട്ടിയ തെങ്ങിൻ ചോട്ടിലേക്ക് പോയിയെന്നാണ് പറയുന്നത്.

2. കുഞ്ഞാലി എറമുള്ളാനോട് പള്ളി കിണറ്റിലെ വെള്ളം കുടിക്കാൻ ചോദിക്കുന്ന ഭാഗത്ത് മയ്യത്തുകളുടെ നെയ്യുള്ള വെള്ളമായതിനാൽ ഇന്നേവരെ ആരും പള്ളി കിണറ്റിലെ വെള്ളം കുടിച്ചിട്ടില്ലെന്ന് പറയുന്നുണ്ട്. പിന്നീട് വെള്ളം വലിച്ച് മടുത്തപ്പോൾ എറമുള്ളാൻ തൊട്ടിയിൽനിന്നും വെള്ളം കുടിച്ചതായും, ഇതെങ്ങനെ?

3. സുന്നത്ത് കല്ല്യാണം കഴിഞ്ഞതുകൊണ്ട് അധികം താമസിക്കാതെകുഞ്ഞാലി മുകൾനിലയിലേക്ക് കിടപ്പ് മാറ്റി. അതുകൊണ്ട് പൂക്കുഞ്ഞി ബീയെ അവിടെനിന്നും മാറ്റി കിടത്താൻ ആറ്റബീ തീരുമാനിച്ചുവെന്നും പറയുന്നു. പീന്നീട്, പാത്തുമ്മയുടെകൂടെ കുഞ്ഞി ബീ ഉറങ്ങാൻ തുടങ്ങിയതുകൊണ്ട് കുഞ്ഞാലിയെ മുകൾ നിലയിലേക്ക് വിട്ടുവെന്നുമാണ് പറയുന്നത്.

4. കുതിരയ്ക്ക് തൂറ്റുപിടിച്ചതുകൊണ്ട് പൂക്കോയ തങ്ങൾ സവാരിക്ക് പോയില്ലെന്നു പറയുന്നുണ്ട്. ശേഷം മറ്റൊരിടത്ത് കുതിരയ്ക്ക് വാതം പിടിച്ചതുകൊണ്ട് ചരിത്രത്തിൽ ആദ്യമായി തങ്ങൾ കുതിര സവാരി ഒഴിവാക്കിയെന്നും പറയുന്നു. തൂറ്റുപിടിച്ചപ്പോൾ സവാരി മുടങ്ങിയിരുന്നല്ലോ പിന്നെങ്ങനെ വാതം പിടിച്ചപ്പോൾ ആദ്യമായിട്ടാണ് സവാരി മുടങ്ങിയതെന്ന് പറയാനാകും?

2009ൽ സ്മാരക ശിലകൾ വായിച്ചപ്പോൾ എനിക്ക് അനുഭവപ്പെട്ട സമാന സംശയം എന്റെ ചേട്ടനും ഉണ്ടായെന്നത് ഇപ്പോഴെന്നെ സന്തോഷിപ്പിക്കുന്നുണ്ട്. പീന്നീട് ഫിക്ഷൻ എഡിറ്റിങ്ങിന്റെ ആവശ്യകതയെക്കുറിച്ച് കേട്ടപ്പോഴൊക്കെ കുഞ്ഞബ്ദുള്ളയുടെ സ്മാരകശില എന്റെ മനസിലേക്കെത്തി തെറ്റുകളുടെ താളുകൾ മറിച്ചിട്ടുണ്ട്. ഒരു എഴുത്തുകാരന് സ്വയം എഡിറ്ററാകാൻ കഴിയുന്നില്ലെങ്കിൽ മറ്റൊരാളുടെ സഹായം തേടണമെന്നുതന്നെയാണ് എന്റെ അഭിപ്രായം. കൃത്യമായ വെട്ടിത്തിരുത്തലുകളില്ലെങ്കിൽ വായനയുടെ ഒഴുക്കിനിടയിൽ സംശയത്തിന്റെ ചുഴികൾ രൂപപ്പെടുത്തുകയും അത് വായനക്കാരെ അസ്വസ്ഥരാക്കുകയുംചെയ്യും.

(ഫേസ്ബുക്കിൽ കുറിച്ചത്)
Published under on September 14, 2020